وين راح عمري...؟

وين راح عمري...؟



سعدات ايامي
مين كان راسي خاوي
كان هاز لي هبالي
ونا طايش ما داري
ب اللي كان داوي
نسْرح ب رجليا
فين يزهى ليا
أو نضحك حتى الضرسة
تبان ليا
القلب خفيف وهاوي
عبار غيارو خاوي
ماشي جوال
حياتي فوق كتافي
ب الضحكة غالب صروفي
وشبابي تجاوز ظروفي
دازت ليام ..
ويامي....
شابت شواتي
ثقال عيار حياتي
تغيرت عادتي
شراني الهم
من بعد ما بعتو
ملكني السقام
وساومني ف صحتو
غير لبارح ولحال ديالي
صايكْ لموج لعالي
ضارب الدنيا ب ركالي
ف غمضة عين
الحال رجع موحال
بغيت نشد راس لخيط
فْلَتْ ليا
زالت الشوفة
من عينيا
حاولت نقاوم
عمري ما سمح ليا
عيطت عيطة حنينة
فينك يا شبابي
يا مذوب عذابي
فينك يا همتي وشاني
يامنورة جناني
ربيع ليام طفات شمعتو
زالت حلاوتو
ب ريح لخريف
اللي دازت على كل خضر
وقطفاتو